。我的回憶錄。

2016年5月21日星期六

2015。芬蘭&蘇格蘭&倫敦。序

原來成幾年無寫Blog喇..哈哈...雖然又係遲左好多先寫遊記,但都希望將呢d珍貴回憶記錄落黎.

芬蘭,係我人生必到地方之一.

我既里數生涯,全因我睇左一篇粒粒玲子用里數換機票去芬蘭住玻璃屋&睇北極光既blog而開始,佢影既相都好靚好靚好吸引我,令我決心一定要去!我要學似佢咁,用里數換機票去見識呢個無限大既世界.

以前覺得北極光只會係電視上見到,亦無諗過自己真係會去到芬蘭呢D咁凍既北歐國家追光.仲有最緊要搵到旅伴,畢竟呢D地方唔係個個都會想去,所以我覺得自己好好彩,可以有三個志同道合既姊妹一齊出發!

話說,2014年11月既某一晚同姊妹食完飯坐係星巴克閒聊,談起旅行時提及芬蘭,估唔到大家都有興趣,
下一句就話"咁一齊去啦!",
第二句"大家夠唔夠里數先?"
第三句"夠里數就宜家即刻約埋時間啦!",
第四句"就不如黎個聖誕除夕芬蘭&英國&法國之旅啦!"
Well,團已成,期已定,心已決!!
呢晚,大家愈傾愈興奮,大家愈講愈High,仲話返去zip高枕頭冷靜諗清楚係咪真係話去就去,大家都了起左條癮,團火邊有易熄丫XDDDDD,So....Let's do it!!!!!

我地知道係聖誕除夕呢D旺季換機票係非常困難既事,所以首先要積分換里數再換機票.
係同一時間我地就SEACH定資料..飛邊先呢..再點利用停留..轉機..缺口呢..點與點中間個交通又點安排呢..時間又就唔就到呢..所以話呢,里數真係一門學問黎架.

原先計劃 :
HKG -- HEL (AM換機票)
**HEL -- RVN (自費機票)
RVN -- INARI (5小時巴士)
IVL -- LGW (自費機票)
London -- Paris (來回歐洲之星)
LHR -- HKG (AM換機票)

**HEL去RVN個程,其實芬蘭航空可以換機票,但問過好多次都未有位放同唔知有無4個位咁多,所以我地決定自費買,等一來唔知會唔會有,二來一陣連我地其他航段都無哂位就麻煩,唔好因小失大!

2015年11月份,巴黎受到大型恐怖襲擊,一百幾十人喪生,一個月多後就出發去巴黎既我地進入左自我矛盾期,該去定不該去呢?!理性當然叫唔好去啦,但去得英國無理由唔去埋巴黎丫..更何況第一次去歐洲,巴黎就好似係必去既地方,加上火車飛&酒店已全部訂哂,行程亦安排好哂,買野...食野...各人都已經有哂心水有哂目標,宜家先話唔去,邊有咁易講得出口呢~最終考慮到兩重大原因,1-我地係聖誕後除夕前留三日兩夜,都係一個高危期,2-唔想令家人擔心,無謂去個旅行而攪到家嘈屋閉.如果比起以前,我實會投如常出發一票,但現家有癌父,出發到已經要開香檳慶祝,唔想令佢擔心所以我係投左放棄巴黎一票.

但火車飛同酒店都無得退款只可以係有限日期內轉日子,每人蝕左$1700..無計啦,當$1700拾返條命仔.

好喇,決定唔去巴黎,咁個三日去邊好呢?留返係英國深度遊好丫定去第二個地方好呢?我地衡量過去其他鄰近國家既價錢同停留時間,都唔係太適合,所以決定個三日去蘇格蘭.

最終計劃 :
HKG -- HEL (AM換機票) 稅$1901
HEL -- RVN (自費機票) $925
RVN -- INARI (5小時巴士) $386
IVL -- LGW (自費機票) $2730
London -- Edinburgh (來回火車) $1350
LHR -- HKG (AM換機票)

直至出發前既三個月,爸爸不幸地發現有腫瘤,個時仲未驗到係咪癌症,一家人陷入低迷,就係我做正顎手術前兩日,爸爸就同我講叫我年尾唔好去旅行,話我唔係香港,如果佢有d咩事唔知可以搵邊個(簡單d其實淨係我可以令我爸安心),我又要顧住哥哥睇住媽媽,要穩定軍心睇實鋪頭,因為鋪頭係我地屋企主要收入來源,所以呢個時候我更加唔應該出國.

個日係我知道爸爸有腫瘤後既第一次流淚,因為覺得好無奈,覺得好多野都唔輪到我選擇,我好多野都要硬食,之前已經叫我辭職返鋪頭幫手因為哥哥承受壓力太低,就算我幾唔想我都要照做,因為屋企有事我一定要幫,我唔介意,但宜家連我期待左一年既旅行都無得去,我真係好傷心好失望,我係完全明白為左屋企我應該係要咁做,但我個內心係充滿無奈悲傷,我仲好記得個晚一離開醫院就打比朋友放聲大哭,好似將一路既感情舒發哂出黎.

所以係呢段期間其實我係好唔開心,但我無得揀.

基本上大部份交通住宿一早就安排好哂,我仍同旅伴講請照預埋我,未book好既酒店交通都照預埋我,我寧願蝕錢都博機會如期出發.

結果係12月頭,仍未確診到既爸爸唯有進入觀察期,佢知我仍心掛去旅行一事,佢就話如果唔比我去我會遺憾一世,佢唔想我唔開心,話宜家佢又暫時無咩野就比我如期出發,個下個心情真係好複雜,開心係開心,但又會記掛爸爸情況,唔好理喇...有得去就去!點知係出發前一個星期,爸爸好突然透唔到氣入左醫院,心當然擔心緊張爸爸情況,但另一方面又會好衰女咁擔心去唔成旅行,爸爸雖然要住院嗅氧氣,但身體其他情況都正常,爸爸好安慰我咁講如果個晚無入到醫院等之後情況惡化既話我實出發唔到,又估唔到入到黎又無咩野,佢話所以呢個旅行注定我要去,就叫我放心d去,唔會掛住佢(鬼咩...點會唔掛心丫..),出發個晚,爸爸仲電話叮囑好朋友小心睇住做完正顎手術仍在康復既我,於是....我就帶住興奮又期待但又掛心既複雜感情出發喇!!!

2014年6月20日星期五

發洩文。

我有胃潰瘍我相信一半原因都係拜工作所賜,因為係公司既胃氣係異常多兼巨響.

表面上我成日都笑笑口好開心,其實只係我有壓力但我無表露出黎.

呢一年半期間,我由一個部門既工作變成要負責三個部門既野,人走左你又唔請,成日搵人攝位...我1個打到10個但打唔到20個呢....好,你唔請我就選擇性OT,拖得既野我就拖,你到時唔好問我點解,我一早講過我做唔到咁多野!

我覺得自己都算係咁啦...有邊樣野唔係如期死出黎俾你...我呢d吃力不討好位...應付上面又要安撫下面...仲要聽咁多是是非非...又有邊個理我感受?脾氣再好都有燥底既時候...

仲有,我唔怕蝕底但唔代表樣樣都要我摟上身,好心你地自己負責既野就有責任心d做好佢,安守本份好難咩?就算fd底都係咁講,唔俾d說話俾d面色你睇我都過唔到自己個關.

呢半年更加連喘息既空間都無,一早返工就忙到收工,收工仲要諗公司d野,呢兩個月更甚.

有時去旅行除左滿足自己既慾望外,就真係想放鬆一下開心一下叉叉電.

所以呢排更加想行開下,好想去日本!但奈何時間&價錢都夾唔到,迫住要放棄,咁岩朋友去上海工幹跟埋去,近近地請1日去3日2夜都好丫,再唔行開下我怕我會發癲,但原來個天唔俾我去日本係有原因架,因為今日又有人遞信喇,我又要頭痛了!>.<