漫長戰爭。開始

2013年10月4日

我終於做左由細到大都好想做既事,就係箍牙.

細細個其實就知道自己D牙唔齊 ,有倒及,小學時曾經帶過矯正器直到升中一時箍牙,但個陣又怕帶著棚鋼牙返學會俾人蝦所以放棄左.

直到中五畢業第一時間就去睇牙醫想箍牙,牙醫話好彩我細個放棄左,因為我發育未完成,就算個時箍完之後都會移位,加上我有倒及牙同咬合問題,並唔係單單箍牙就可以解決到既問題,醫生話如果我要箍牙就要削骨,做"正顎手術".


 

正顎手術就係從你口腔內開刀,削走多餘既骨,將上下顎移返去一個合適既位置令到咬合正常.

削骨.....一聽個名個心都有D驚,何況係我阿媽,梗係哂手兼擰頭啦.....

之後再睇多幾個牙醫拎多個意見,佢地既答案都係一樣,要箍牙就要做正顎手術,如果我堅持淨箍牙唔做手術,醫生話得,但個效果只會係比宜家齊少少咁解 ,因為始終都係骨頭問題.

返屋企同阿爸阿媽商量,佢地都唔贊成,因為我既情況未至於去到食唔到野,笑笑下都可以甩鲛...等等嚴重問題,自己都衡量過有無咁既需要,當時我只係知自己真係好唔鐘意個下巴兜兜,側邊影相永遠個下巴都係凸出黎, 一E起棚牙笑就會覺得好奇怪好核凸,倒及牙會令到我好介意好介意....但呢個始終都係外觀問題....所以哩埋喊完一場後....就將箍牙一事藏於心底...

9年後

雖然自己鐘意食野,但自問每日早晚我都有刷牙,但始終都有蛀牙.牙痛既問題,睇過牙醫後,先知原來我d牙生得迫,又歪,好多位都係刷唔到,一定要用牙線,同埋原來咬合唔正常除左影響食野之外仲會影響埋清潔,正常情況下咬合正常既牙齒之間既磨擦係可以磨走牙齒上既食物,再透個刷牙徹底清潔牙齒.基本上我上下顎既所有大牙互相touch到既位置係得好少,所以我刷牙只係刷走表面個層,係唔夠乾淨,牙醫最後都係建議我去箍牙,一勞永逸,如果唔係長此下去我d牙好快就玩完,除非我係好勤力每日用牙線每次刷牙超過n分鐘同每三個月洗一次牙啦.

我當然無忘記箍牙=正顎手術

又係拜訪幾個牙醫睇下現今既技術可唔可以做到淨箍牙唔做手術,但答案都係同9年前一樣,要箍牙就做手術,唔做手術就寧願唔箍, 無謂哂錢哂時間.

你問我...我梗係想箍架,我梗係想做手術架,過左咁多年後我個心都仍然想,加上宜家有埋牙齒健康問題,加上正顎手術比以前成熟左又多人做左,把心一橫下定決心!做!

同屋企人傾過,佢地都贊成我做雖然佢地都唔太想,始終開刀削骨咁大件事.

而我最後好好彩地搵到一個好好既箍牙醫生,佢好細心好詳盡,佢仲會考慮到我既情況而幫我,真係真係好感激佢!

另外我負擔唔到私家醫生既十幾萬手術費,佢轉介左我去菲臘做正顎手術,菲臘唔係個個都收,係睇當時醫院需唔需要類似既案例同牙齒既嚴重性,係菲臘做手術只需要俾住院費同材料費,約六千多元,點解同私家差咁遠?因為係菲臘幫你做手術既唔係專業既醫生,而係"醫科生",好聽d我地就叫教學病人,難聽d就叫白老鼠,我梗係會擔心啦...但又無辦法...想做正顎手術但又俾唔起錢睇私家唯有承擔多d風險.

經過菲臘每月一步驟(初檢..影x-ray..覆檢..開會...)等等,我終於係半年後箍左牙喇!!

為左記錄呢件人生大事,我會每個月影一張相見証我牙齒既變化.

有人會問我係咪真係有咁既需要做手術,其實我點解釋部份人都會認為我係去整容,如果我真係整容我就會整埋眼耳口鼻啦...有時都懶得解釋,人地鐘意點講就點講,你試下生成咁睇下你會點!如果一個健康既牙齒就唔會好似我上圖d牙咁.

同埋好多人表面睇我好似無咩野,因為我已經習慣性口合埋但牙係唔會咬合,如果牙咬合埋其實會顯到兜d.

其實呢兩張相影完就好鬼想delete左佢,但就係因為要同佢say goodbye所以更加要post上黎!