香港去台中 : 2013-05-29 (三) 12:15 - 13:55
台北返香港 : 2013-06-02 (日) 20:05 - 21:50
台中留1晚,清境留2晚,台北留1晚,5日4夜.
原本應該係早一個星期出發,但係出發前幾日竟然遇著世紀大豪雨,一落雨我清境真係邊到都唔洗去,何況如果大雨上清境幾危險,好彩民宿老闆都體諒俾我推遲,但只可以改期一次,而兩間酒店亦俾我改期,機票改期都無問題.
2013年5月29日 (三)
國泰港龍香港去台中一日得兩班機,一係就十二點機一係就兩點機
台中清泉岡機場真係好細,拎行李既運輸帶都係得兩條.
出閘後就去買左唱錢,買電話卡,台灣上網真係平到喊,HK$50三日無限上網,仲有少少分鐘打電話.
落一層去車站搭公車出市中心,電視機上會有各班次到達/開出時間&目的地.
天氣好哂好熱,唔似係世紀大豪雨之後.
係公車上一路報平安一路感恩天氣好好,心情都特別爽!
架車連埋我都係得幾個人,有個阿嬸阿叔沿途同我傾計,台灣人真係好熱情,不斷提醒我注意事項,叫我記得買悠遊卡,因為頭八公里坐公車係唔洗錢,叫我記得係邊到落車,點行點行就到架喇,附近有d咩可以去行下睇下,叫我唔好去邊到邊到,個到d人唔友善,台灣都有惡人架,當然唔少得問我點解咁大膽一個女去旅行,屋企人又放心既....點點點,不過我都預左實會有人問!
係台中火車站落車行前幾步就係我住既地方 - 達欣商務精品飯店.
我係agoda book左一間單人房,$343一晚,包早餐.
我係好滿意間房!!就算我將個o急灘開哂,我仲有好多空間可以活動,電視掛牆.
洗水間簡單乾淨,已經足夠!
窗外就係台中火車站,成間房都"是是正正",很好!!
台中火車站,站外有一排巴士站可去多個地方,非常方便,而我就乘搭33號公車去逢甲大學.
落車後要行段路先到逢甲夜市,好笑既事就發生,
無啦啦俾兩個女仔叫停問我"這裡有什麼好吃呀?"
我又唔知係咪我聽錯就問返佢"什麼?"
女仔"我問你呀,這裡有什麼好吃?我不是台中人,我第一次來這邊想看看有什麼好吃."
哦.......原來個女仔當左我係台灣人!
我就表明身份其實我係香港人,我都係第一次黎,宜家都係行緊去逢甲夜市.
佢自己都好驚訝原來我係香港人,我都明既,我個樣生得太友善喇,哈哈哈哈哈!!
兩個女仔同我年齡相約,大家都好多野講,我諗至少係條街傾左超過半個鐘,我地仲交換左line.
最後佢都提醒我去逢甲夜市要小心d,因為有好多大陸遊客既扒手.
到達lu~
今次我好冷靜呀,我只係玩左身上幾個$10咋.
逢甲大學.
原本我係想去一間叫龍貓森林咖啡館,成間coffee shop都係龍貓擺設,但逢甲真係太大喇,間野係文華路55巷3號,我問人邊到係文華路,佢由東指向西話一整條都係叫文華路,就好似彌敦道咁,由尖咀落到去旺角都係叫彌敦道,所以搵左一段時間後我就放棄lu...
本身我對菇類不是太喜好,但上網都話鹽酥菇好好味,所以我就買左一份試下喇.
係真係好好食呀!!將唔同類型既菇拎去炸,但炸完d菇唔會乾身,食落仲好有菇味,又放左少少調味粉,好香!!我到宜家都好想食多次!!
不過一個人去旅行有個唔好處就係食野無得share,唔食得多,好似呢份菇咁,無理由食少少就唔要,成份食哂再飲多杯野已經飽哂.
行完逢甲夜市就去一中商圈,由於台中係無捷運所以都係要搭公車,出發前有個朋友又係試過一人遊台中,叫我係台中寧願搭的士都唔好搭公車,因為好浪費時間,起初我都掙扎緊...我成日覺得去得旅行就應該要融合下佢地既生活,如果下下都搭的士又好似無左個種樂趣,加上我自己一個搭的士好似好奢侈,同埋路程都遠遠地,都係搭公車啦,我就開始後悔喇...
首先搵個巴士站已經搵到我死....睇地圖明明係附近點解仲見唔到...以為行錯路就去左另一個巴士站...但又唔見有wor!左問右問,原來我已經企左係個站到,只係我望唔到巴士站...個牌....如果唔係台灣d人話我聽呢個就係巴士站我仲以為佢係廣告牌....
之後又要等左唔知耐先有公車...又搭左好耐先到一中商圈...早知真係聽朋友勸搭的士啦,真係省左好多時間!!
一中商圈無逢甲夜市咁大,應該話係逢甲夜市太大!
朝聖!!Stay Real!!
1/F賣衫,2/F就係Coffee Shop.
叫左杯Mocha同食左件Cake,但都唔平呀,兩樣加埋成舊水,但又未至於去到好好食,係真係旨在阿信開所以先黎捧下場.
一中2街.
有d似係五分埔,小小的巷,多多的服飾店.
行到11點幾就諗住返酒店,不過走之前要買一買夜宵先,自從係逢甲飲左一杯"檸檬愛玉綠"就愛上了,宜家買第二杯,haha!!
一條友又唔知食咩好,本身又飽飽到,所以買左份芥末蜜糖雞扒.
一中商圈好近酒店所以我搭的士,司機又係問我做咩自己一個人旅行,問我先生係邊,我話未結婚,問我係咪因為情傷,我話唔係,純粹想試下一個人去旅行..
又問我有男朋友未,我話未有,佢就好似長輩d語氣話"小姐,看你樣貌也不差也很和善呀,你年紀也不小了,如果認識了一個不錯的人就定下來吧,不要太挑呀,年紀愈大愈難認識男孩子呀.."我就笑笑口"好好好...我知道了"
最後佢話"和你認識也是緣份吧,我也祝福你要幸福哦,我收你便宜點吧!"
雖然係一個人旅行,但我一d都唔覺得寂寞,今日沿途都感受到台灣人既溫暖,我同佢地素未謀面,但佢地既說話處處都包含關心,真係令人幾warm!
返到去二話不說訓係到休息下睇陣電視先.
檸檬愛玉綠好飲!雞扒不過不失,始終炸野凍左無咁好食.
我的一人遊 Day 1,完.
沒有留言:
張貼留言