2015。芬蘭&蘇格蘭&倫敦。Day 2

2015年12月24日(四)

萬眾期待既聖誕節黎喇,芬蘭既第一朝.

早一日係超市買定材料homemade早餐

朝早8點既街道,天黑黑...黑黑..

傳說中既8號巴士...個站,呢個巴士站會有牌寫著8號巴士既資料,但唔係個個巴士站都一定有牌

巴士站離我地都好近,係Apartment附近個公園到有個站

但等了又等…再等….過埋到站時間都仲未見到巴士個影,少少淆底既情況下打去巴士公司到問,原來係架巴士遲左..嚇死咩…
一收線就見到車頭燈,嘩,一上車見到都好多人,仲要大部份都係亞洲人XD,得幾個人係去機場,15-20分鐘車程就去到聖誕老人村.

當個個係門口排緊隊時,我地就先周圍影下相,避下人群

燈柱上既藍色線係北極圈既邊界，當我地跨過條藍色線就代表我地踏入左北極圈,之前搜集資料時成日會見到呢個畫面，估唔到今日終於到我親手影低呢個場景🎄❄

咁既情景真係好夢幻呀....

去搵聖誕老人lu!~

聖誕老人村周邊有Outlet,有紀念品店,有餐廳,有郵局…當然仲有聖誕老人既所在地.

花左30歐影左張大相,好彩個個都影得唔錯,其實都明知呢D影相擺到明係賺遊客錢,但一次半次,去得旅行就預左比人賺下,同埋真係叫留個紀念,就算宜家望返都好鬼開心^O^!

係Outlet入面有一個來自上海媽媽級Sales,佢問我有無睇到北極光,我話我地只係留左一晚睇唔到,我問佢其實係Rovaniemi會唔會睇到,佢話梗係會,係我地黎芬蘭既前幾日先出現,話個光好強,仲要持續左一個鐘,真係聽到都令人振奮並羨慕呀*O*,不過極光呢家野你話想見就想咩,所以心態上都要調整到為隨緣,如果唔係失落感就會好大.

趁天光要影下相

有兩層賣紀念品

下一步做咩呢?就係做好重要既寄聖誕卡環節喇!聖誕卡你可能會收過唔少,但由真正既聖誕老人村所寄出既兼印有聖誕老人村個印既聖誕卡你又收過未呢?!

聖誕老人村最迫爆人既地方應該就係郵局

想坐低寫聖誕節卡...梗係無位啦...所以就先買卡再去食Lunch慢慢寫.

普普通通既一餐

往往想像中係美好,諗住食完慢慢寫,但當你見有人係到等緊位個陣係唔會做得出,所以食完就起身走人.

最終無辦法下係室外坐低寫,忍受住寒風吹襲寫足20張,原子筆墨都係咁斷換過幾支.

郵筒會有分兩個,一個係當天寄出,另一個係黎緊既聖誕節,所以我地可以一次過寄哂兩年既聖誕卡,耶!!

我隻右手比凍風吹到紅哂

寫比2016年聖誕節既自己時,除左2015年既感受外,都會對2016年既自己有疑問,到時會係邊呢?同邊個一齊呢?2015既聖誕過得咁精彩,2016既聖誕會唔會比左落去呢?宜家我可以肯定2016一定唔會比2015差,因為2016既聖誕我要去冰島呀!!耶!!無錯呀!!係冰島呀!!尖叫吧!!去冰島其實都有段故既, 段故就留返冰島篇再講.

仲有件好奇妙既事,我朋友係郵局內竟然撞到自己所教既學生,真係估唔到去到咁遠都會見到,有時世界真係好細!

聖誕老人村入面都有雪橇同鹿仔坐,不過我地留返係Inari玩,因為留係Inari時間多d.

回程巴士站

行到咁上下就決定早一班車返Apartment準備北上Inari.好彩一早去排隊搭車咋,回程時多人到都上唔到車,要再等一個鐘後既車.

等車都要影下相先

返到Apartment小休一下就出發去搭長途車lu.

由Rovaniemi去Inari係需要5個鐘頭既車程,Inari最近既機場係隔離45分鐘車程既Ivalo機場,想坐飛機既話當然要睇下夾唔夾到唔係日日都有航班既時間同價錢.

網上預購巴士飛,4個人會有group discount,折左每人4百蚊到.真係要讚下自己一早買定飛,一來呢班係尾班車,我地唯一一班北上既車,二來係比想像中多人,all full,有人無買飛就要企,真係第一次坐5個鐘既長程巴士,估唔到時間過得好快,訓係佔左大部份既時間,唔會覺得好辛苦.

去到Ivalo個陣差唔多都醒哂,當然望出窗望下風景啦,望望下...e...點解遠處既天空會有一撻綠色既野呢?就叫同伴一齊望下喇..都係坐係窗邊既阿欣就話會唔會係極光呢?!我都覺得似係,佢係零零舍舍一撻係天空飄下飄下咁,因為巴士既高速行駛好快就離開左視線範圍lu,而呢個成為左一個疑問,係咪真係極光呢?!

團員們既充足杯麵&零食準備+垃垃雜雜食餘既野=夜晚11點既晚餐.

Twin room

我地book左兩間房,一間twin room(EUR118@)同一間superior room with sauna(EUR152@),因為sauna房係面向湖,對監視有無極光好緊要,空間又大d聚埋一齊鬆動d,閒時又可以sauna下.

其實twin room原先都可以望到湖景,但因為酒店係湖邊加建,正正遮哂我間房既視線,oh no!

另外酒店都會有提供雪地活動.